Nuk janë dakord të gjithë me Ramën edhe tek kampi socialist. Shumë zbehtë por gjithsesi me një nuancë jomiratimi ka folur sonte te report tv deputeti socialist, Artan Gaçi. I pyetur rreth skandaleve me tenderat e qeverisë së majtë ai ka mbajtur frymën tek tenderat në IT shumica e të cilavë janë marrë nga një kompani që ka qënë më parë pronë e ministrit Ilir Beqaj.
“Në Shqipëri janë dy situata është tregu publik dhe tregu privat. Në tregun publik janë emrat e fituesve i keni tek APP tek në listat e më të pasurve të Shqipërisë janë pak a shumë të njejtët, të cilët normalisht në një treg formal duhet të ishin po të njejtët që bënin edhe shumicën e punëve të tregut privat sepse shërbimë në IT kanë nevojë jo vetëm shteti, por edhe bankat, shoqëritë e telekumunikacionit etj. Nuk më rakordon kjo situatë, është tjetër treg dhe tjetër operator në IT në ndërtim në shumë fusha që operojnë me privatin dhe të tjerë operatorë që veprojnë eksluzivisht me shtetin, unë nuk mund të flas më tepër, por mua kjo gjë nuk më rrin”.
Gaci ka theksuar një fenomen në Shqipëri ku të pasurit e vendit nuk bëjnë asgjë përvecse mbledhin para.
“Mua më vjen shumë keq si deputet por dhe si qytetar i këtij vendi kur shikoj listën e më të pasurve të Shqipërisë e krahasoj me listën e më të pasurve të çfardolloj vendi tjetër të botës. Kudo në botë që nga Amerika deri tek shteti më i varfër shikon emra njerëzish prestigjiozë që kanë bërë për vendin e tyre, që kanë investuar, që kanë ngritur industri, që kanë shpikur sisteme, që kanë investuar në vendin e tyre, kurse në Shqipëri 20 më të pasurit e Shqipërisë janë njerëz ku në variantin më të mirë janë thjesht importues shumë e ligjshme dhe nuk kam asgjë kundër importuesve se në atë ekonomi jetojmë dhe në pjesën tjetër janë njerëz abuzues ose përfitues të parave publike”.
