Socialistët e Shkodrës sërish kanë debatuar me deputetë e tyre të majtë gjatë një tjetër mbledhjeje në këtë qytet. Në një takim ku morën pjesë deputetët Ditmir Bushati, Namik Kopliku dhe Paulin Sterkaj, socialistët kanë kërkuar që qeveria të shtojë punësimet nga rradhët e tyre.
Drejtues të organizatave lokale thanë se nuk kanë pse kërkojnë vota për PS-në kur deputetët nuk interesohen për punësimin e tyre.
Gjatë mbledhjes shpesh janë ngritur zërat vecanërisht ndaj deputetit Kopliku i cili u akuzua për grupazh dhe nepotizëm në PS e Shkodrës. “Ti i bën mbledhjet sa në një klub në një tjetër, i bën me grupime dhe si ke qejf”, i ka thënë një nga pjesëmarrësit ne mbledhje.
Pas mbledhjes, i deleguari Ditmir Bushati deklaroi për mediat se debatet ishin konstruktive. Lidhur me votat e PS për PD në këshillin e qarkut ai tha se kjo ishte një papërgjegjshmëri politike dhe individuale të secilit.
