Zyra Qendrore Kombëtare Interpol Tirana kreu ekstradimi nga Milano, Itali, drejt vendit tonë, të shtetasit shqiptar, Tristan Peçi, 31 vjeç, lindur e banues në Elbasan. Sipas njoftimit zyrtar të Interpol Tiranës, mësohet se ky shtetas, është shpallur në kërkim ndërkombëtar pasi, gjykata e Rrethit Gjyqësor Elbasan, me vendimin nr. 215, datë 07. 11. 2005, ka vendosur ndaj tij, masën e sigurisë “arrest në burg”, për kryerjen e veprës penale të “vrasjes së mbetur në tentativë e kryer në bashkëpunim”, parashikuar nga nenet 76, 22-25 të Kodit Penal të Republikës së Shqipërisë.
Më pas me vendimin Nr. 300, datë 11. 12. 2006, Gjykata Elbasan e ka dënuar këtë shtetas me 15 vjet e 6 muaj burg.
Ngjarja për të cilën është dënuar Tristan Peçi, ka ndodhur në datën 24. 08. 2005, rreth orës 10:00, në Elbasan. Tristan Peçi dhe shtetasi K. P., kanë qenë duke udhëtuar me makinën tip “Toyota”, dhe kanë mbërritur në afërsi të shkollës së mesme “Ahmet Dakli”.
Aty kanë parë shtetasin H. T., duke ecur në bulevard, kanë ndaluar makinën dhe kanë zbritur nga makina kanë qëlluar në drejtim të tij me armë zjarri. Tristan Peçi ka qëlluar me pistoletë ndërsa K. P., me automatik dhe më pas janë larguar me shpejtësi , kanë parkuar makinën te shtëpia e shtetasit L. T., dhe janë larguar në drejtim të paditur.
Si rezultat i bashkëpunimit të Interpol Tirana me Interpol Romën, u bë i mundur arrestimi i tij ne Itali, duke u finalizuar me ekstradimin e tij drejt vendit tonë.
Në aeroportin Nënë Tereza në Rinas ky shtetas iu dorëzua përfaqësuesve të Drejtorisë së Përgjithshme të Burgjeve.
