Mësohet se Prokuroria e Kukësit ka nisur hetimet për kapërcim kompetencash nga ana e policisë, si edhe për organizatorët e protestës së paligjshme
Ministri i Brendshëm Saimir Tahiri, ka reaguar ditën e sotme për ngjarjen e ndodhur dje në Kukës, ku protesta e disa qytetarëve për faljen e kamatë-vonesave u shoqërua me dhunë e incidente. Ndërsa ka njoftuar pezullimin e punonjësit të policisë i cili në pamjet e filmuara gjatë protestës shfaqet duke nxjerrë armën, ministri Tahiri thotë se kjo masë është marrë deri në hetim të plotë të ngjarjes.
Duke e cilësuar të dhunshme protestën e djeshme në Kukës, Ministri Tahiri shkruan në rrjetin social “Facebook” se pjesëmarrja me armë në tubim është e paligjshme, “ashtu siç është tërësisht e papranueshme sjellja e punonjësve të policisë që tejkalojnë ligjin për t’i bërë ballë paligjshmërisë së cilitdo”.
“Pavarësisht se protesta e disa qytetareve në Kukës ishte e paligjshme dhe e dhunshme, punonjësi i Policisë së Shtetit është pezulluar deri në hetimin e plotë të ligjshmërisë së veprimeve dhe zbatimit të procedurave të parashikuara. Pjesëmarrja me armë në një tubim, është e paligjshme. Ashtu siç është tërësisht e papranueshme sjellja e punonjësve të policisë që tejkalojnë ligjin për t’i bërë ballë paligjshmërisë së cilitdo. Detyrimi i punonjësve të policisë për të respektuar ligjin, është më i madh se liria që çdo qytetar mund t’i japë vetes për të shkelur ligjin. Hetimi disiplinor i Policisë së Shtetit, Shërbimi i Ankesave dhe Heshtjeve të Brendshme dhe Drejtoria e Inspektimit pranë Ministrit të Brendshëm, do hetojnë plotësisht këtë rast, si dhe do rishikohen aktet dhe procedurat për zbatim në rastet e tubimeve dhe masave policore. Ashtu siç besoj, hetimet e Prokurorisë do nxjerrin përgjegjësitë përkatëse, pa kursyer kërkënd”, shkruan ministri Tahiri.
Një ditë më parë, Policia e Shtetit sqaroi se Shefit të Seksionit për Krimet në Komisariatin e Policisë së Kukësit, kanë tentuar t’i marrin armën e shërbimit, ndaj edhe ai e ka nxjerrë nga brezi.
Mësohet se Prokuroria e Kukësit ka nisur hetimet për kapërcim kompetencash nga ana e policisë, si edhe për organizatorët e protestës së paligjshme.
