Jetmir Pepa, i njohur edhe si “Mir Pepa”, është arrestuar në Dubai, pasi ishte shpallur në kërkim nga Strukturat e Posaçme kundër Korrupsionit dhe Krimit të Organizuar (SPAK).
Pepa dyshohet se është i përfshirë në veprimtari kriminale që lidhen me trafikun e drogës dhe pastrimin e parave. Ai ishte shpallur në kërkim ndërkombëtar rreth një muaj më parë.
Emri i Jetmir Pepës është përmendur edhe në dosje hetimore ku janë zbardhur biseda me persona të tjerë të dyshuar, mes tyre edhe Isa Aliu. Në këto komunikime është përmendur edhe një pagesë prej 1 milion eurosh cash, e cila dyshohet se është kryer në një hotel në Tiranë.
Arrestimi në Dubai pritet të pasohet nga procedurat ligjore për ekstradimin e tij drejt Shqipërisë, ku autoritetet shqiptare do të vijojnë hetimet për akuzat ndaj tij.
