Genta Vangjeli
Zëdhënësja për Antikorrupsionin në Partinë Demokratike, Genta Vangjeli, ka ngritur pikëpyetje mbi përdorimin e 1.2 milionë eurove fonde publike për rikonstruksionin e Vilës 31 në Tiranë.
Në një deklaratë publike, Vangjeli kujton se në janar të vitit 2025, kryeministri Edi Rama zhvilloi një konferencë për shtyp me rastin e hapjes së rezidencës artistike “Vila 31 x Art Explora”, ku u tha se rinovimi i godinës ishte realizuar nga një studio arkitekturore ndërkombëtare.
Sipas saj, në njoftimet publike në rrjetet sociale, faqja zyrtare e projektit bën të ditur se në prill 2025 godina është rinovuar me mbështetjen e fondacionit francez Art Explora Foundation, ndërsa restaurimi është prezantuar si një projekt i studios arkitekturore NeM Architects.
Megjithatë, sipas dokumenteve që citon opozita, rezulton se për rikonstruksionin e Vilës 31 janë prokuruar më herët 1.2 milionë euro nga fondet publike përmes Drejtorisë së Shërbimeve Qeveritare, me miratim të kryeministrit.
Vangjeli thekson se operatori ekonomik Valona Konstruksion shpk është shpallur fitues i tenderit dhe më 21 korrik 2023 ka lidhur kontratën nr. 144/17 me Drejtorinë e Shërbimeve Qeveritare për rikonstruksionin e Vilës 31, me një afat realizimi prej 12 muajsh.
Sipas saj, këto të dhëna ngrenë dyshime serioze për mënyrën se si janë përdorur fondet publike.
“ Nëse rinovimi i kësaj godine është kryer nga një studio e huaj me mbështetjen e një fondacioni ndërkombëtar, atëherë kryeministri duhet të sqarojë publikisht se çfarë punimesh ka realizuar konkretisht kompania fituese dhe ku kanë përfunduar 1.2 milionë euro nga paratë e taksapaguesve shqiptarë,” shprehet Vangjeli. a.b
