Prokuroria e Posaçme Kundër Korrupsionit dhe Krimit të Organizuar ka përfunduar kontrollet e ushtruara ndaj biznesmenit Samir Mane në kuadër të hetimeve për grupin kriminal të dyshuar të drejtuar nga Ilir Shtufi dhe Artur Koçeku.
Sipas informacioneve paraprake, gjatë kontrolleve hetuesit e SPAK kanë sekuestruar telefonin celular të biznesmenit, si edhe një sërë dokumentesh që do t’i nënshtrohen verifikimeve të mëtejshme.
Kontrollet janë kryer në kuadër të hetimeve që lidhen me dyshimet për pastrim parash të produkteve të veprës penale. Burime pranë hetimit bëjnë me dije se po verifikohen transaksione dhe marrëdhënie të mundshme financiare që mund të kenë shërbyer për legalizimin e të ardhurave të dyshuara kriminale të grupit.
Deri në këtë fazë të procedimit nuk është bërë e ditur nëse ndaj Samir Manes është ngritur ndonjë akuzë, ndërsa veprimet hetimore vijojnë për të përcaktuar rolin dhe përfshirjen e mundshme të personave të ndryshëm në skemën e dyshuar të pastrimit të parave.
SPAK nuk ka dhënë ende një njoftim zyrtar mbi rezultatet e kontrolleve dhe materialet e sekuestruara. r.k
