Deputetja e Qarkut të Shkodrës, Marjana Koçeku, e njohur ndryshe si “Neomalsorja”, ka njoftuar largimin nga grupi parlamentar i Partisë Socialiste, duke u bërë deputetja e parë që shkëputet nga mazhoranca në kulmin e protestave qytetare kundër qeverisë së kryeministrit Edi Rama.
Lajmi u bë publik nga vetë Koçeku përmes një mesazhi në rrjetet sociale, ku njoftoi se do të vijojë mandatin si deputete e pavarur.
“Prej sot jam deputete e pamvarum. Idealet e vlerat e mia janë ato që i kam pasë e i kam shprehë qysh para se me u asociu me nji parti. Ato m’i diftojnë kufijtë”, shkruan Marjana Koçeku.
Vendimi i saj vjen në një moment kur prej më shumë se dy javësh mijëra qytetarë janë në protestë kundër qeverisë, ndërsa presioni publik ndaj mazhorancës është rritur ndjeshëm. Ndonëse deputetja nuk ka sqaruar arsyet konkrete të largimit, njoftimi i saj është interpretuar si një zhvillim me peshë politike në kampin socialist.
Lajmi u prit me duartrokitje dhe brohoritje nga protestuesit e mbledhur para Kryeministrisë. Një prej organizatorëve të protestës e cilësoi largimin e Koçekut si një tregues të ndikimit që, sipas tyre, po prodhon lëvizja qytetare dhe e ftoi deputeten t’i bashkohet protestës.
Mbetet për t’u parë se cilat kanë qenë arsyet që e kanë çuar Marjana Koçekun drejt largimit nga grupi parlamentar socialist. Megjithatë, zhvillimi vjen në një kohë kur protestat kundër qeverisë vijojnë të mbledhin pjesëmarrje të konsiderueshme, ndërsa debati politik në vend mbetet i tensionuar.m.k
