Kuvendi nisi këtë të enjte me një minutë heshtje kushtuar genocidit grek në Çamëri.
“Përpara se të fillojmë me rendin e ditës ju bëj me dije se nisur nga fakti se data 27 Qershor është shpallur në kalendarin kombëtar si dita e genocidit ndaj shqiptarëve të Çamërisë nga grupi parlamentar “Demokraci dhe Integrim” është kërkuar mbajtja e një minutë heshtjeje në përkujtim të viktimave të genocidit”, tha kryetarja e Kuvendit, Lindita Nikolla.
Ceremonia e heshtjes u ndoq nga një fjalim i kreut të PDIU, Shpëtim Idrizi. Ai tha se masakra ndaj të parëve nuk falet e as nuk harrohet.
“Një nga spastrimet etnike më të egra në historinë e Shqipërisë. Shumë mund të thonë që kanë kaluar kaq shumë vite, por genocidi nuk ka moshë. Unë dhe kolegët deputetë jemi për t’ju thënë se memorja e një kombi është më e madhe se e një njeriu. Ajo shkon nga brezi në brez. Jam këtu për ta sqaruar dhe për ta thënë më me forcë sepse masakra ndaj të parëve tanë ne nuk i falim, nuk i harrojmë, por i nderojmë sot dhe në çdo ditë të qenies sonë”, tha Idrizi duke rikthyer masakrat e spastrimit etnik të shqiptarëve në Çamëri nga gorcat qeveritare greke, spastrim që nisi në vitet ‘20 dhe kulmoi në vitin 1944-1945.
Retorika për Çamërinë më Tiranë fatkeqësisht ka ulje ngritje të vazhdueshme varësisht nga marrëdhëniet dhe interesat e politikës në dy vendet. Kjo e ka dëmtuar zgjidhjen e çështjes çame, një nga më të dhimbshmet në Evropë dhe ndër më të errësuarat. Për 35 vite debat mes dy vendeve, Greqia nuk ka bërë asnjë hap përpara nfërsa ia ka dalë të avanvojë axhendat e saj në Shqipëri si në ekonomi, politikë por edhe histori siç janë varrezat e ushtarëve grekë të luftës italo greke në jug të vendit. a.b
