Gazetari i News24, Osman Stafa, ka denoncuar një incident që, sipas tij, ka ndodhur pas fjalimit të mbajtur në protestën qytetare të zhvilluar në Tiranë.
Sipas dëshmisë së kolegut që ndodhej me të në momentin e ngjarjes, Stafa është përballur me fyerje dhe provokime nga një çift bashkëshortësh, të cilët dyshohet se e kanë ofenduar për shkak të profesionit të tij.
Ngjarja ka ndodhur teksa protestuesit po marshonin drejt Qytetit Studenti. Persona të tjerë të pranishëm kanë ndërhyrë për të shmangur përshkallëzimin e situatës, ndërsa më pas është njoftuar policia.
Në një reagim zyrtar, Policia e Tiranës bëri të ditur se rreth orës 22:00, pranë sheshit “Skënderbej”, është raportuar një konflikt mes disa shtetasve. Shërbimet e Komisariatit Nr. 3 kanë ndërhyrë menjëherë, duke parandaluar përshkallëzimin e konfliktit dhe duke shoqëruar në komisariat personat e përfshirë.
Sipas policisë, gazetari Osman Stafa ka kallëzuar se është sharë, ofenduar dhe gërvishtur nga shtetasit Z. N. dhe M. P., duke pësuar dëmtime të lehta.
Nga ana tjetër, dy personat e shoqëruar kanë deklaruar se konflikti nisi pas një debati verbal me gazetarin, pasi ky i fundit u kishte kërkuar llogari në lidhje me mospraninë e tyre në tubimin e zhvilluar në qytet. a.b
