Ish-ministri i Jashtëm, Ditmir Bushati, ka reaguar ndaj deklaratave të kryeministrit Edi Rama, i cili gjatë fjalimit të një dite më parë ia atribuoi algoritmeve përmasat që kanë marrë protestat politike që kërkojnë dorëheqjen e tij.
Reagimi i Bushatit vjen pas protestës së fundit qytetare në Tiranë, e cilësuar si më masivja deri më tani, gjatë së cilës protestuesit rrethuan në mënyrë paqësore godinën e Kryeministrisë.
Përmes një postimi në rrjetet sociale, Bushati thekson se lëvizja qytetare nuk është produkt i algoritmeve apo i ndikimeve të huaja, por shprehje e pakënaqësisë së qytetarëve ndaj mënyrës së qeverisjes.
“Nuk janë të nxitur nga Irani, as nga algoritmet, e aq më pak të humbur në qëllimet e tyre. Janë shqiptarë të revoltuar nga trajtimi i atdheut si plaçkë. Të vetëdijësuar për pasojat e aleancës së dëmshme mes politikës, oligarkisë, medias dhe krimit të organizuar. Janë qytetarë që besojnë se Shqipëria meriton më shumë: më shumë drejtësi, më shumë dinjitet, më shumë shpresë dhe më shumë mundësi për të gjithë”, shkruan Bushati.
Më tej, ish-ministri socialist shprehet se zhvillimet e ditëve të fundit tregojnë se ideja e një “Shqipërie të Re” po shndërrohet në një realitet të pashmangshëm.
“Çdo ditë që kalon e forcon bindjen se Shqipëria e Re nuk është thjesht një aspiratë, por një kapitull i pashmangshëm që duhet përqafuar. Ky është një moment që kërkon reflektim të thellë, urtësi dhe përgjegjësi”, përfundon ai.
Deklarata e Bushatit vjen në një moment kur brenda Partisë Socialiste po shtohen zërat që flasin për nevojën e reformimit të partisë dhe të një “Marrëveshjeje të Re për Shqipërinë”. Më herët gjatë ditës, edhe ish-kryetarja e Kuvendit, Elisa Spiropali, publikoi një mesazh në rrjetet sociale, ku ritheksoi idenë e një “Shqipërie të Re” dhe nevojën që Partia Socialiste të vetëpastrohet, të bëhet më demokratike dhe më meritokratike. Reagimet e saj erdhën një ditë pasi Rama ironizoi në mbledhjen e grupit parlamentar të PS-së zërat brenda partisë që promovojnë këtë koncept.
