Kapet në Ksamil Elvis Koçi, alias Elvis Çaushllari, i njohur ndryshe si “Vis Korçari”, i dënuar nga GJKKO si pjesëmarrës në atentatin ndaj Sokol Sanxhaktarit.
Policia e Sarandës, në bashkëpunim me Drejtorinë e Forcës së Posaçme Operacionale, finalizoi operacionin e koduar “Fast”, duke vënë në pranga 34-vjeçarin e shumëkërkuar dhe të konsideruar me rrezikshmëri të lartë shoqërore.
Sipas njoftimit zyrtar, Elvis Koçi u lokalizua në qendër të Ksamilit, teksa lëvizte me një automjet tip “Audi”. Në momentin e ndërhyrjes së policisë ai tentoi të largohej, por u neutralizua dhe u arrestua nga efektivët.
Koçi ishte shpallur në kërkim pasi Gjykata e Posaçme e Apelit për Korrupsionin dhe Krimin e Organizuar kishte lënë në fuqi vendimin e GJKKO-së, që e dënonte me 4 vite burg për veprat penale “Grup i strukturuar kriminal” dhe “Sigurimi i kushteve dhe mjeteve materiale për të kryer vrasje”.
Sipas policisë, atij i kanë mbetur për të vuajtur edhe 2 vjet, 9 muaj e 9 ditë burgim.
Materialet procedurale i janë referuar Prokurorisë për veprime të mëtejshme.a.b
