11 persona u vranë ndërsa 10 u plagosën, mes tyre një polic pas një sulmi me armë në Cetinë në Mal të Zi pak orë pas mesditës.
Sulmuesi u qëllua për vdekje nga policia.
Katër të plagosur janë shtruar në spitalin e Cetinjës, ndërsa dy të plagosur janë transportuar në Qendrën Klinike në Podgoricë. Sulmuesi ka qëlluar edhe mbi fëmijët, raporton media vendase Vijesti.
Ngjarja ndodhi rreth orës 15 e 30 minuta të së premtes në Cetinje dhe sipas Drejtorit të Policisë Zoran Brđanin, 34-vjeçari ka qëlluar me armë zjarri në drejtim të një familjeje, anëtarët e së cilës po qëndronin në shtëpinë e tij si qiramarrës. Duke përdorur një armë gjahu ai u ka marrë jetën dy fëmijëve, njëri prej tetë dhe tjetri njëmbëdhjetë vjeç dhe ka plagosur nënën e tyre. Më pas ka dalë në rrugë duke hapur zjarr ndaj kalimtarëve.
Në vendngjarje përveç forcave të policisë që neutralizuan autorin, mbërritën edhe ambulanca të shumta, të cilat transportuan për në spital të plagosurit e këtij sulmi.
Për ngjarjen reagoi edhe kryeministri i Malit të Zi, Dritan Abazoviç, i cili me anë të një mesazhi në rrjetin social Telegram shprehu keqardhjen dhe ngushëllimet e tij për familjarët e viktimave.
“Ka ndodhur një tragjedi që Mali i Zi nuk e mban mend. Ftoj të gjithë qytetarët e Malit të Zi që të luten për familjet e viktimave të pafajshme, të afërmit, miqtë e tyre dhe të gjithë qytetarët e kryeqytetit historik të Cetinjës”, shkroi Abazoviç, i cili njoftoi se qeveria do të shpallë tre ditë zie për tragjedinë që tronditi shtetin fqinj. m.k
