Ushtarët ukrainas brenda uzinës Azovstal në Mariupol thonë se Rusia po refuzon premtimet e një armëpushimi për të lejuar evakuimin e civilëve.
Presidenti rus Vladimir Putin u ka bërë thirrje luftëtarëve të dorëzohen. Por Kievi thekson se ata nuk do të dorëhiqen.
“Në Mariupol, në Azovstal situata është kritike. Trupat ruse po bombardojnë uzinën dhe nuk ndalen. Dje dhe sonte forcat ruse tentuan të hynin. Ushtarët tanë po luftojnë. Rezistenca do të vijojë deri në plumbin e fundit, deri në forcën e fundit”, thotë Denis Shmyhal, kryeministër i Ukrainës.
Gjatë ditës së enjte Kombet e Bashkuara arritën të evakuojnë më shumë se 300 civilë nga zona e Azovstal. Një tjetër operacion shpëtimi pritet të realizohet.
“Kjo është përpjekja e dytë për të evakuuar civilët nga Mariupol dhe zonat e tjera të qytetit port Sot shoqëruam 11 autobusë ku kishte gra, fëmijë, të moshuar të cilët kërkojnë siguri”, thotë Ghada Eltahir Mudawi, pjesëtar i operacioneve të shpëtimit.
Pjesa tjetër e qytetit të shkatërruar tashmë është nën kontrollin rus dhe pastrimi ka filluar në prag të 9 majit, ditën e fitores sovjetike ndaj nazistëve.
Shumë analistë besojnë se më 9 maj Putin mund të shpallë një ndryshim në strategjinë e tij për të pushtuar Ukrainën.
Pse është i rëndësishëm Mariupol për Rusinë:
Rusia e ka rrethuar dhe bombarduar qytetin për javë të tëra. Ka disa arsye pse Mariupol është një qytet kyç për fushatën ushtarake të Moskës në Ukrainë, sipas BBC.
Ura tokësore: Kontrolli i qytetit u jep rusëve një urë tokësore nga Rusia, përmes pjesëve të rajonit të Donbasit të mbajtura nga separatistët e mbështetur nga Rusia, deri në Krime, të cilën Rusia e aneksoi në 2014.
Goditja e ekonomisë së Ukrainës: Mariupol ka qenë prej kohësh një port i rëndësishëm strategjik në Detin Azov, pjesë e Detit të Zi. Në kohë normale, qyteti është një qendër kryesore eksporti për çelikun, qymyrin dhe misrin e Ukrainës. Humbja e tij është një goditje e madhe për ekonominë e Ukrainës.
Propaganda ruse: Mes mbrojtësve të Mariupolit janë Brigada Azov, e cila ka lidhje me ekstremistët e djathtë, historikisht duke përfshirë neo-nazistët. Ata përbëjnë vetëm pjesën më të vogël të forcave luftarake të Ukrainës, por prania e tyre shpesh përdoret si pretekst për pretendimin e Rusisë për të çliruar Ukrainën nga nazistët.
Liron rrugë për forcat ruse: Një fund i betejës së zgjatur për qytetin do të lironte më shumë trupa ruse për shtytjen e saj për të marrë kontrollin e pjesëve të mbetura të Donbasit në Ukrainën lindore, të përbërë nga Luhansk dhe Donetsk.
