Gjatë vizitës në Shtetet e Bashkuara të Amerikës, lideri i opozitës, Sali Berisha, i shoqëruar nga kryetari i Partisë Republikane të Shqipërisë, Fatmir Mediu, ka zhvilluar një takim me kryetarin e nënkomisionit të Kongresit Amerikan për Evropën, kongresmenin e Teksasit, Keith Self.
Në qendër të diskutimit kanë qenë problemet madhore me të cilat përballet Shqipëria, kryesisht trafiku i drogës, korrupsioni dhe ndikimi i tyre në proceset zgjedhore, si dhe lufta ndaj karteleve të drogës.
Gjatë takimit u vu theksi te qëndrimet e shprehura nga Presidenti Donald Trump dhe Sekretari i Shtetit Marco Rubio, sipas të cilëve partneriteti strategjik me Shqipërinë synon, në radhë të parë, luftën pa kompromis ndaj trafikut dhe karteleve të drogës.
Sipas opozitës, krimi i organizuar dhe paratë e drogës po përdoren nga administrata dhe qeveria e Edi Ramës për të manipuluar zgjedhjet, për të kontrolluar pushtetin dhe për të pastruar paratë përmes aferave korruptive. Kjo situatë u vlerësua si jashtë standardeve të një vendi anëtar të NATO-s.
“Rama ka shkatërruar Kushtetutën”
Sali Berisha e njohu kongresmenin amerikan me situatën në të cilën ndodhet vendi. Berisha tha se kryeministri Rama ka shkatërruar Kushtetutën dhe institucionet e pavarura, duke përqendruar në duart e tij një pushtet absolut që prodhon korrupsion absolut.
Po ashtu, u ngrit shqetësimi se qeveria kontrollon drejtësinë dhe po e përdor atë si armë politike kundër opozitës, me qëllim mbajtjen e pushtetit.
Konteksti rajonal dhe roli i kongresmenit Self
Nga ana e tij, kongresmeni Keith Self e vlerësoi situatën në Ballkan si një problem të madh, veçanërisht në kontekstin e zhvillimeve globale dhe ndikimit të Rusisë.
Duke pasur një eksperiencë të hershme, pasi ka qenë i angazhuar gjatë kohës së luftës së Bosnjës, Self tregoi interes të shtuar për zhvillimet në rajon.
Berisha e falënderoi kongresmenin për qëndrimet e tij, përfshirë deklaratën për dënimin e Ratko Mlladiçit, një iniciativë që Self e mori së bashku me senatoren Jeanne Shaheen dhe senatorin Pressley.
Berisha shprehu mirënjohje edhe për interesin që kongresmeni ka treguar për Luginën e Preshevës dhe përshpejtimin e anëtarësimit të Kosovës në NATO.
Propozimi për zgjedhjet: Modeli i Maqedonisë së Veriut
Gjatë bisedës u konstatua se, sipas palës shqiptare, si Aleksandar Vuçiç në Beograd, ashtu edhe Edi Rama në Tiranë, nuk lejojnë zhvillimin e zgjedhjeve të lira dhe të ndershme.
Si zgjidhje për garantimin e një procesi demokratik dhe instalimin e një demokracie normale, ku pushteti vendoset përmes votës së lirë, u propozua krijimi i një qeverie teknike, duke marrë si model rrugën e ndjekur nga Maqedonia e Veriut.
Kongresmeni Self shprehu interes për hapat që mund të ndërmerren në vijim, duke konfirmuar se do të vazhdojë ta ndjekë me vëmendje situatën në Ballkan dhe veçanërisht në Shqipëri.a.b
