Qarkullimi në aksin Tiranë-Durrës dhe Durrës-Tiranë do të kufizohet përkohësisht gjatë netëve të 1, 2 dhe 3 shtatorit, për shkak të punimeve për montimin e trarëve metalikë në mbikalimin e ri të Kasharit.
Ndërhyrja bëhet në kuadër të projektit “Zgjerimi i Superstradës Tiranë–Durrës (Faza III)” dhe, sipas Autoritetit Rrugor Shqiptar (ARRSH), do të zhvillohet nga ora 23:00 deri në 05:00.
Gjatë këtij intervali do të bllokohen përkohësisht korsitë e lëvizjes në të dyja drejtimet e aksit kryesor dhe trafiku do të menaxhohet përmes rrugëve alternative.
Në drejtimin Tiranë-Durrës, automjetet do të devijohen përmes rampës provizore në drejtim të Rinasit dhe do të vijojnë në rrugën dytësore. Rikthimi në autostradë do të bëhet përmes rrugës së Rinasit dhe rampës përkatëse në drejtim të Durrësit.
Mjetet e rënda, veçanërisht kamionët, do të devijohen që nga nyja “Casa Italia”, duke vijuar lëvizjen nëpërmjet rrugës dytësore.
Ndërkohë, në drejtimin Durrës-Tiranë, automjetet do të devijohen përmes mbikalimit Kashar-Thumanë dhe do të vijojnë në rrugën dytësore në anën e majtë. Rikthimi në autostradë do të bëhet pas mbikalimit të Kasharit.
Për automjetet që kanë destinacion Rinasin, Shkodrën dhe Kosovën, orientimi do të bëhet që në mbikalimin e autostradës Kashar-Thumanë, për të vijuar më pas në drejtimet përkatëse.
ARRSH njofton se gjatë gjithë kohës së punimeve do të vendoset sinjalistikë e përkohshme rrugore dhe do të jenë të pranishëm punonjës për menaxhimin e trafikut.
Autoriteti u kërkon drejtuesve të mjeteve të respektojnë sinjalistikën dhe udhëzimet e personelit, ndërsa i rekomandon qytetarët të planifikojnë paraprakisht itineraret dhe, nëse është e mundur, të shmangin këtë segment gjatë orarit të punimeve.
Kufizimet do të jenë në fuqi vetëm gjatë intervalit 23:00–05:00, në tre netët e përcaktuara për punimet.a.b
