Kryeministri Edi Rama ka folur nga Pogradeci pas përfundimit të ditës së parë të takimeve me drejtuesit politikë, ku në fokus ka qenë përgatitja për vitin e dytë të mandatit qeverisës.
Rama tha se diskutimet janë përqendruar te “Besa”, “Prania Besnike” dhe mënyra e re e komunikimit të qeverisë me qytetarët.
Kryeministri njoftoi gjithashtu krijimin e një ekosistemi të ri komunikimi, përmes të cilit kërkesat, shqetësimet dhe problemet e qytetarëve synohet të ndiqen në kohë reale nga institucionet përgjegjëse.
Në këtë kuadër, Rama përmendi edhe “Pasqyrën Unike”, të cilën e cilësoi si “Pasqyrë Albania”, ku do të përfshihen të gjitha institucionet.
Sipas kryeministrit, sistemi do të mundësojë ndjekjen në kohë reale të kërkesave të qytetarëve, ndërsa institucionet do të monitorojnë përgjegjësitë dhe respektimin e afateve.
“Aty ku Lasgushi vjen me frymëzimet magjepsëse dhe aty ku u përpoqëm të mbledhim reflektimet e një periudhe pushimesh aktive. Kemi diskutuar për Besën, për Praninë Besnike, për ekosistemin e ri të komunikimit të qeverisë me qytetarin, edhe për Pasqyrën Unike ‘Pasqyrë Albania’, ku do të jenë të pranishme të gjitha institucionet”, u shpreh Rama. m.k
