Aktori Mehdi Malkaj ka mbajtur një fjalim me tone të forta në protestën kundër kryeministrit Edi Rama, duke shprehur mbështetjen për protestuesit dhe duke u bërë thirrje qytetarëve t’u bashkohen tubimeve.
Malkaj tha se do të vijojë të jetë pranë protestuesve dhe se do të marrë pjesë në protestë sa herë të ketë mundësi.
“Këta idiotët kanë kaq frikë sa na numërojnë ditë për ditë se sa jemi. Jo vetëm të dorëhiqet, por të heqim edhe dorëvënien. Jam gjithmonë me ju. Kushdo, kush ka kohë për të ardhur duhet të vijë. Sa gjej hapësirë, vij me vrap te ju. O nëne nëne si do ikin këta… Do ikin me brekë nëpër këmbë”, tha aktori.
Në protestën e 85-të, një aktivist deklaroi se qëndresa e qytetarëve prej 85 ditësh, sipas tij, ka treguar dobësimin politik të kryeministrit Edi Rama.
“Rama po shikon se dita ditës votuesit i janë larguar dhe se mbështetja për protestën vetëm rritet”, u shpreh ai.
Aktivisti tha se protesta nuk lidhet vetëm me largimin e qeverisë, por edhe me kundërshtimin e politikave që, sipas tij, cenojnë interesat e vendit.
“Qëndresa jonë po ndan epokat. Për 85 ditë ne vazhdojmë të qëndrojmë për secilin prej nesh sepse Shqipëria është e të gjithëve. […] Fundi i Edi Ramës dhe qeverisë së tij është shumë afër. Për 85 ditë ne kemi treguar rezistencë, qëndresë dhe do jemi këtu derisa Edi Rama të mos jetë më”, deklaroi ai. r.p
