Protesta kundër qeverisë së Edi Ramës ka hyrë në ditën e 84-t, ndërsa protestuesit kanë përsëritur kërkesat që, sipas tyre, i kanë bashkuar në këtë qëndresë të pandërprerë.
Në fokus mbetet dorëheqja e kryeministrit Edi Rama dhe krijimi i një qeverie tranzitore 12-mujore, jopartiake. Sipas protestuesve, kjo qeveri duhet të garantojë një proces zgjedhor të pandikuar dhe të pamundësojë kapjen e zgjedhjeve dhe të institucioneve shtetërore.
Në listën e kërkesave përfshihen edhe shfuqizimi i ndryshimeve elektorale të vitit 2008, ligjit 21/24 për zonat e mbrojtura, ligjit për investitorët strategjikë dhe i të ashtuquajturës “Paketë e Maleve”.
“Mos lejoni që bindjet personale të kthehen në burim përçarjeje”, ishte një nga mesazhet e përsëritura gjatë protestës, ndërsa organizatorët theksuan se qëllimi që i bashkon mbetet largimi i Ramës dhe qeverisë së tij.
Pas fjalimeve, protestuesit nisën marshimin në rrugët e Tiranës, duke vijuar drejt zonës së ish-Bllokut. Gjatë marshimit u dëgjuan thirrje si “Arrestoni Ramën”, “Rama në burg”, “Ju erdhi fundi!” dhe “Shqiptarët e bashkuar, pushteti i tmerruar”.
Protesta u mbyll me këndimin e Himnit Kombëtar, ndërsa organizatorët paralajmëruan vijimin e rezistencës edhe në ditët në vijim. r.p
