Katër vatra zjarri vijojnë të jenë aktive në vend, ndërsa gjashtë të tjera po monitorohen nga strukturat e emergjencave. Sipas Ministrisë së Mbrojtjes, deri në orën 17:00 të 22 gushtit janë evidentuar gjithsej 10 vatra zjarri.
Situata është përmirësuar ndjeshëm në zonën Gojan–Gjegjan të Pukës. Vatrat në Gjegjan, Gojan të Vogël dhe Gojan të Madh janë izoluar, ndërsa forcat në terren po vijojnë kontrollet përgjatë vijës së zjarrit për të parandaluar riaktivizimet.
Në Prozhem të Pukës, zjarri vijon në një sipërfaqe pyjore. Era favorizon përhapjen e flakëve, por aktualisht nuk raportohet rrezik për banesat.
Aktive mbetet edhe vatra në Shtanë–Tenë të Mirditës, ku po ndërhyjnë forcat vendore dhe efektivë të Forcave të Armatosura.
Ndërkohë, në malin e Dajtit vijon operacioni nga toka dhe ajri. Në terren janë angazhuar zjarrfikës, efektivë të Forcave të Armatosura, një helikopter dhe dy avionë Air Tractor. Sipas autoriteteve, nuk ka rrezik për zonat e banuara.
Zjarri në Dukat është shuar plotësisht.
Gjatë operacioneve të zhvilluara gjatë ditës janë angazhuar mbi 300 forca, të mbështetura nga mjete zjarrfikëse, tre helikopterë dhe dy avionë Air Tractor.m.k
