Policia greke ka arrestuar të premten pasdite një 60-vjeçar shqiptar, i cili rezultonte i kërkuar nga autoritetet për një çështje pronësie dhe për një rast mashtrimi në Shqipëri.
Arrestimi u krye nga oficerët e Departamentit të Menaxhimit të Emigracionit në Thermi. Sipas autoriteteve greke, ndaj 60-vjeçarit kishte një urdhër-arresti të lëshuar nga Oficeri Hetues i Selanikut për një shkelje që lidhej me pronën.
Gjithashtu, ai rezultonte subjekt i një “Njoftimi të Kuq” të Interpolit, për një rast mashtrimi të kryer në Shqipëri në vitin 2014.
Sipas policisë, për këtë çështje shqiptari ishte dënuar me 3 vite burg.
Pas arrestimit, 60-vjeçari është dërguar përpara autoriteteve gjyqësore kompetente, të cilat do të vijojnë procedurat përkatëse. r.k
