Prokuroria e Tiranës vijon hetimet për skandalin e “universitetit” në Zall Bastar, i cili dyshohet se në të vërtetë funksiononte si një laborator ku falsifikoheshin diploma dhe dëftesa.
Nga praktikat e kontrolluara deri tani dhe materialet e sekuestruara gjatë hetimit, janë identifikuar të paktën dy mësues që rezultojnë të punësuar me diploma të falsifikuara, të siguruara përmes këtij aktiviteti.
Bëhet fjalë për dy persona të punësuar si mësues, njëri në Kukës dhe tjetri në Dibër.
Hetimet kanë zbuluar gjithashtu një tjetër rast të dyshuar falsifikimi në radhët e administratës publike. Sipas të dhënave të hetimit, një punonjës i Agjencisë Shtetërore të Kadastrës (ASHK) në Fier rezulton se nuk ka kryer arsimin përkatës dhe dyshohet se ka përdorur një diplomë të falsifikuar.
Për të tre këta shtetas, Prokuroria e Tiranës i është drejtuar gjykatës me kërkesë për pezullimin e menjëhershëm nga detyra, si dhe për ndjekjen penale të tyre për veprat penale të falsifikimit dhe deklarimit të rremë.
Një vit më parë u arrestua personi që zotëronte laboratorin i cili ndërkohë ishte edhe kandidat për deputet i Koalicionit Euroatlantik që drejtohej nga Lulzim Basha.
Hetimet për laboratorin e dyshuar të falsifikimit në Zall Bastar vijojnë, ndërsa Prokuroria po verifikon edhe dokumentacionin e personave të tjerë që mund të kenë përfituar diploma apo dëftesa të falsifikuara.a.b
