Kreu i Partisë Demokratike, Sali Berisha, ka reaguar pas vrasjes së 20-vjeçarit portugez në Ksamil, duke e cilësuar ngjarjen si pasojë të lidhjeve mes krimit dhe shtetit.
Berisha deklaroi se vrasja e turistit të huaj është, sipas tij, “pothuajse vrasje shtetërore”, duke sqaruar se nuk e ka fjalën për një ekzekutim të kryer nga persona me uniformë, por për situatën që, sipas tij, ekziston në industrinë turistike të Sarandës. Ndërkaq 3 persona me uniformë ishin të përfshirë në këtë ngjarje të rëndë.
“Vrasja e 20-vjeçarit portugez, turist në Ksamil, është një akt sipas të dhënave, pothuaj vrasje shtetërore”, u shpreh Berisha.
Sipas tij, industria turistike në Sarandë është nën ndikimin e grupeve kriminale dhe “shteti dhe krimi janë një”.
“Ligji nuk ekziston”, deklaroi Berisha, ndërsa akuzoi se në Sarandë dhe zona të tjera ekziston një ekonomi e lidhur me trafikun e drogës dhe të qenieve njerëzore.
Berisha kritikoi gjithashtu situatën në zonat turistike dhe plazhet, duke pretenduar se hapësirat publike janë dominuar nga persona që operojnë me shezlongje me çmime të larta.a.b
