Mirditë/ Kapet në flagrancë duke ndezur tre vatra zjarri, arrestohet 65-vjeçari
Një 65-vjeçar nga fshati Gziq i Mirditës është arrestuar në flagrancë, pasi dyshohet se po shkaktonte qëllimisht vatra zjarri në zonë.
Policia e Mirditës finalizoi operacionin e koduar “Piromani”, pas një pune gjurmuese tre ditore, të bazuar në informacionet e siguruara në rrugë operative se 65-vjeçari merrej me zjarrvënie të qëllimshme.
Në momentin e ndërhyrjes, P. M., 65 vjeç, banues në fshatin Gziq, Njësia Administrative Rrëshen, dyshohet se sapo kishte ndezur tre vatra zjarri, të cilat përfshinë një sipërfaqe pyjore.
Vatrat u vunë menjëherë nën kontroll nga shërbimet zjarrfikëse, në bashkëpunim me efektivët e Komisariatit të Policisë Mirditë.
65-vjeçari u arrestua për veprat penale “Shkatërrimi i pronës me zjarr” dhe “Shkatërrimi me zjarr i pyjeve dhe i mjedisit pyjor”.
Nga hetimet paraprake dyshohet se ai mund të jetë autor edhe i disa zjarrvënieve të tjera të regjistruara më herët në territorin e Bashkisë Mirditë.
Nën drejtimin e Prokurorisë, vijojnë hetimet për dokumentimin e plotë të rasteve të tjera për të cilat 65-vjeçari dyshohet si autor. Materialet procedurale do t’i referohen Prokurorisë për veprime të mëtejshme. m.k
