Thirrjet “Arrestoni Ramën, arrestoni Ballukun” kanë shoqëruar mbrëmjen e sotme marshimin e protestuesve në rrugët e Tiranës, në ditën e 80-të të protestës kundër qeverisë.
Qytetarët vijojnë të kërkojnë dorëheqjen e kryeministrit Edi Rama, formimin e një qeverie teknike dhe largimin e klasës së vjetër politike.
Gjatë marshimit janë dëgjuar edhe thirrjet “Shqipëria kërkon revolucion”, “Ju erdhi fundi” dhe “Rama në burg, Berisha në burg, Belinda në burg”.
Pjesë e protestës kanë qenë edhe shqiptarë nga Diaspora. Më 14, 15 dhe 16 gusht, pjesëmarrja e tyre ishte e dukshme në tubimet kundër qeverisë, ku u kërkua largimi i Ramës dhe krijimi i një qeverie teknike.
Në protestën e 80-të, eksperti i IT-së Gent Progni u bëri thirrje qytetarëve t’i bashkohen protestës, duke e cilësuar atë si një “rizgjim kombëtar”.
“Të kërkosh institucione që të shërbejnë, drejtësi që të mos vonojë, polici që të mbrojë, arsim ku fiton ai që meriton, punë ku nuk të kërkohet bindje politike dhe një shtet ku ligji nuk ndryshon sipas emrit që ke. Këto nuk janë kërkesa luksi”, u shpreh Progni.
Ai u bëri thirrje qytetarëve të mos qëndrojnë indiferentë ndaj zhvillimeve politike.
“Një demokraci e shëndetshme ka nevojë për qytetarë që nuk shiten, që kërkojnë llogari, që nuk tremben nga pushteti dhe nuk verbohen nga partitë. Sot thirrja ime është për atë që më dëgjon e shikon: ti je ndryshimi”, deklaroi ai.
Në protestë pati edhe akuza të drejtpërdrejta ndaj deputetëve të Kuvendit, të cilët një qytetar i kritikoi për mungesë reagimi ndaj kryeministrit.
Ai kërkoi largimin e Ramës nga detyra, duke deklaruar se, sipas tij, edhe akuzat për vjedhje, edhe paaftësia do të ishin arsye për dorëheqjen e tij.
“Ik se je hajdut, ose je i paaftë, sepse të gënjejnë të tjerët. Në të dy rastet duhet të ikësh”, u shpreh protestuesi.
Në përfundim, ai deklaroi se do të vijojë qëndrimin në shesh deri në dorëheqjen e kryeministrit dhe u bëri thirrje qytetarëve që t’i bashkohen protestës.a.b
