Të paktën 38 persona janë shoqëruar nga Policia e Sarandës për t’u marrë në pyetje në lidhje me vrasjen e 20-vjeçarit portugez Luis Valera, ngjarje e ndodhur në orët e para të mëngjesit në lokalin “Principote” në Ksamil.
Pas arrestimit të 29-vjeçarit Sokrat Vata, i dyshuar si autor i vrasjes, hetimet janë zgjeruar për të zbardhur të gjithë dinamikën e ngjarjes dhe personat që mund ta kenë ndihmuar të largohej nga vendi i krimit.
Në kuadër të hetimeve është ndaluar Moisid Matushaj, 24 vjeç, banues në Gjirokastër dhe me detyrë Ndihmës Specialist i Hetimit të Krimit në Drejtorinë Vendore të Kufirit Gjirokastër. Sipas burimeve, Matushaj punonte gjithashtu si bodyguard i kompanisë “Elite Security”, së bashku me Sokrat Vatën, në lokalin “Principote”.
Ai dyshohet se ka ndihmuar Vatën të largohej pas ngjarjes. Hetuesit po verifikojnë edhe rolin e dy shtetasve turq, të cilët u kapën së bashku me Sokrat Vatën në automjetin ku ai ishte fshehur në bagazh.
Sipas dyshimeve të ngritura nga hetimi, Vata punonte gjithashtu si bodyguard i shtetasit turk që drejtonte automjetin, ndërsa po verifikohet nëse dy shtetasit turq kanë pasur dijeni për ngjarjen dhe për faktin që 29-vjeçari ndodhej i fshehur në bagazh.
Ndërkohë, është shpallur në kërkim edhe Bekim Bulica, 36 vjeç. Sipas të dhënave të hetimit, ai ndodhej në vendin e ngjarjes dhe më pas është larguar në drejtim të Tiranës, me qëllim shmangien e hetimit.
Burimet bëjnë me dije se pritet që hetimet të çojnë në arrestimin e personave të tjerë, ndërsa vijon puna për përcaktimin e përgjegjësive të secilit prej personave të përfshirë.
Mihuel Mendes u gjet pa shenja jete rreth orës 05:15 në zonën e plazhit, ndërsa dyshohet se u godit me thikë gjatë një konflikti. Sokrat Vata u kap rreth pesë orë më vonë në aksin Levan-Fier, i fshehur në bagazhin e një automjeti.
