Katër persona kanë mbetur të dëmtuar gjatë riparimit të motorit të një skafi në Porto Palermo, në Himarë.
Sipas informacioneve paraprake të Policisë, rreth orës 19:20, në Qendrën Shëndetësore Himarë janë paraqitur për ndihmë mjekësore shtetasit XH. I., 40 vjeç, A. O., 38 vjeç, M. M., 25 vjeç dhe A. D., 18 vjeç, të cilët kanë pësuar djegie në pjesë të ndryshme të trupit.
Nga verifikimet paraprake dyshohet se të katër personat janë dëmtuar pasi kanë rënë në kontakt me benzinë, gjatë punës për riparimin e motorit të skafit.
Të dëmtuarit janë transportuar drejt Spitalit Rajonal të Vlorës, ku po marrin ndihmë mjekësore më të specializuar.
Grupi hetimor, nën drejtimin e Prokurorisë, vijon verifikimet për të përcaktuar rrethanat e plota të ngjarjes.
