Protesta e 79-të kundër qeverisë dhe kryeministrit Edi Rama është zhvilluar këtë të hënë para Kryeministrisë, ku protestuesit përsëritën kërkesat për largimin e qeverisë dhe ndryshimin e klasës politike.
Gjatë tubimit, një prej protestuesve adresoi akuza ndaj fondacionit Soros, duke kërkuar që aktiviteti i tij në Shqipëri të shpallet i padëshirueshëm.
“Mesazhi i dytë është për mafien Soros”, deklaroi ai, duke iu referuar një dokumenti publik për krijimin e kushteve të punës së fondacionit në Shqipëri. Protestuesi pretendoi se Soros ka ndikuar negativisht në vend dhe e lidhi këtë me pretendime për “shpopullimin e Shqipërisë”.
Ai tha se, pas largimit të qeverisë Rama dhe përmbushjes së pesë kërkesave të protestuesve, fondacioni Soros duhet të shpallet “non grata” në Shqipëri.
“Rama është në largim, por ne nuk duhet të largohemi nga sheshi”, u shpreh protestuesi, duke bërë thirrje për vijimin e protestave edhe gjatë muajve të ardhshëm.
Në fjalën e tij, ai iu referua edhe etiketimeve të kryeministrit ndaj protestuesve si “sorra” dhe “korba”, duke i kthyer këto terma në një simbol të qëndresës së tyre.
“Sorrat dhe korbat janë shpendë të zgjuar dhe presin, rrinë në pritje. Këta zogj nuk sjellin fundin, por parashikojnë fundin”, deklaroi ai.
Edhe protestuesja Luçiana Kokaj u shpreh se qytetarët duhet të vijojnë qëndresën deri në largimin e klasës politike, duke theksuar se protesta duhet të mbetet e qytetarëve.
“Në 79 ditë ju kemi treguar që jemi shqiptarë të vërtetë dhe nuk e lëshojmë këtë shesh pa shpëtuar Shqipërinë”, tha Kokaj.
Ajo deklaroi se, sipas saj, protestuesit synojnë largimin e klasës politike që e ka drejtuar vendin prej dekadash.
“Për një gjë jemi të sigurt: duam të largojmë këtë kastë politike që na ka marrë peng të ardhmen”, u shpreh ajo. m.k
