Një shpërthim i dyshuar me lëndë plasëse ka ndodhur gjatë natës në fshatin Zallë të Fushë-Krujës, në derën e banesës së Ylli Zallës.
Sipas informacionit paraprak të Policisë, në derën e banesës është vendosur një sasi e dyshuar lënde plasëse, e cila më pas ka shpërthyer. Nga ngjarja janë shkaktuar dëme materiale, ndërsa ka marrë flakë dhe është djegur edhe automjeti në pronësi të Zallës, i cili ishte parkuar pranë banesës.
Ylli Zalla është një emër i njohur për autoritetet dhe rezulton në kërkim që prej nëntorit 2025, kur në banesën e tij u zbulua një arsenal armësh, në kuadër të hetimeve për atentatin e Rinasit, ku mbetën të vrarë Gilmando Dani dhe Muçi Shaljani.
Zalla dyshohet nga autoritetet si bashkëpunëtor në ngjarjen e nëntorit 2025, ndërsa hetimet për zbardhjen e plotë të atentatit vijojnë.
Më 20 shkurt 2026, policia zbuloi një tjetër arsenal armësh në fshatin Zall, që dyshohet se i përkiste 49-vjeçarit.
Ndërkohë, rreth 12 vite më parë, Zalla ishte arrestuar për prodhim të bombave artizanale, ndërsa ishte hetuar edhe për përfshirje në prodhimin dhe shitjen e lëndëve narkotike. Në atë periudhë, autoritetet dyshonin gjithashtu për lidhje të tij me persona të përfshirë në rekrutime për organizatën terroriste ISIS.
Në të kaluarën, Zalla është përmendur edhe për një kërcënim me jetë ndaj pronarit të një kompanie çimentoje në Fushë-Krujë.
Pas shpërthimit të mbrëmshëm, grupi hetimor po punon për identifikimin dhe kapjen e autorit ose autorëve, si dhe për zbardhjen e motivit dhe dokumentimin e plotë të rrethanave të ngjarjes.a.b
