Një violinist 45-vjeçar me origjinë shqiptare është arrestuar në Francë, pasi dyshohet se është përfshirë në trafikun e drogës.
Sipas raportimeve, B. Bakalli, i cili prej disa vitesh jeton dhe punon në Francë dhe është pjesë e një prej orkestrave prestigjioze të vendit, është kapur pranë La Turbie, në zonën e Mentonit, duke transportuar 38.3 kilogramë kokainë të fshehur në automjet.
Mësohet se muzikanti kishte pranuar të kryente transportin kundrejt një pagese prej 20 mijë eurosh. Ndërkohë, grupi që dyshohet se qëndronte pas ngarkesës pritej të përfitonte më shumë se 1 milion euro nga droga.
Pas arrestimit të tij në Francë, në Shqipëri kanë nisur verifikimet nga Policia dhe Byroja Kombëtare e Hetimit për të zbardhur lidhjet e mundshme të 45-vjeçarit me persona të tjerë të përfshirë në aktivitetin e dyshuar kriminal.
Sipas informacioneve të raportuara, B. Bakalli është i martuar dhe ka dy fëmijë.
Hetimet vijojnë në të dyja vendet për të përcaktuar rolin e tij dhe personat e tjerë që mund të jenë të përfshirë në trafikun e sasisë së madhe të kokainës.
