Tre punonjës janë proceduar penalisht për shpërdorim detyre në lidhje me zjarrin që përfshiu Parkun Kombëtar të Lurës, ku janë djegur disa hektarë sipërfaqe pyjore.
Sipas Policisë, nën hetim janë vënë shefi i monitorimit të parkut, K. S., 35 vjeç, dhe dy roje mjedisi, S. L., 51 vjeç dhe A. L., 64 vjeç.
Ata dyshohet se nuk kanë marrë masat e nevojshme për ruajtjen, mbikëqyrjen dhe mbrojtjen nga zjarri të territorit që kishin në përgjegjësi.
Ndërkohë, operacionet për shuarjen e zjarrit vijojnë nga toka dhe ajri. Dy avionë “Air Tractor” janë angazhuar për të ndihmuar në përballimin e vatrave aktive në Parkun Kombëtar të Lurës, si dhe në zonën Qafa e Helmës, Fushë-Bulqizë–Selishtë.
Forcat në terren dhe mjetet ajrore po punojnë të koordinuara për kufizimin e përhapjes së flakëve dhe vendosjen e vatrave nën kontroll.
