Një konflikt për motive pronësie mes dy vëllezërve në lagjen “Uji i Ftohtë” në Vlorë është parandaluar nga policia, e cila ka arrestuar një 47-vjeçar.
Operacioni i koduar “Lidhja” u zhvillua pas njoftimit për konfliktin në familje. Shërbimet e Komisariatit të Policisë Vlorë ndërhynë menjëherë për të sqaruar rrethanat dhe për të parandaluar përshkallëzimin e situatës.
Në pranga është vënë J. T., 47 vjeç, me precedent kriminal për trafikim të lëndëve narkotike. Sipas policisë, ai dyshohet se, për motive pronësie, ka kanosur me armë zjarri vëllanë e tij.
Gjatë ndërhyrjes, policia sekuestroi një pistoletë, dy krehra dhe 30 fishekë.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.
