Prokuroria e Tiranës ka rihapur hetimet për vrasjen e Kozeta Hysenit, një prej ngjarjeve më të rënda të ndodhura në Qytetin Studenti, për të cilën prej vitesh nuk ka pasur një autor të dalë para drejtësisë.
Në kuadër të rihapjes së dosjes, prokuroria u ka kërkuar disa strukturave të policisë që të marrin në pyetje 28 persona, mes tyre edhe individë që janë pyetur gjatë hetimeve të para, njoftoi sot gazetarja Anila Hoxha në Top Channel.
Në listën e personave që do të ripyeten janë dy oficerë policie që kanë hetuar ngjarjen në atë kohë, familjarë të Agim Karafilit, i cili u vra më vonë, si dhe Dritan Gjika dhe Indrit Dule. Ky i fundit kishte deklaruar gjatë hetimeve të mëparshme se natën e ngjarjes ndodhej në banesën e të fejuarës.
Prokuroria ka kërkuar gjithashtu rimarrjen e dëshmive të tre shoqeve të dhomës së Kozetës, Mirela Metaj, Valbona Kasaj dhe Kozeta Bushi.
Si ndodhi vrasja
Kozeta Hyseni, vajza e një prokurori në Vlorë, u gjet e pajetë në Qytetin Studenti, pasi ishte goditur me gurë në kokë.
Sipas rindërtimit të ngjarjes nga hetimet e kohës, mbrëmjen para se të gjendej e pajetë, një vajzë i kishte thënë shoqes së ngushtë të Kozetës se dikush po e kërkonte poshtë godinës ku ajo banonte.
Kozeta kishte dalë në ballkon, por nuk kishte parë askënd. Më pas ajo kishte zbritur nga godina dhe nuk ishte kthyer më.
Të nesërmen, trupi i saj u gjet pranë kinoklubit të Qytetit Studenti.
Për ngjarjen u shoqërua fillimisht Agim Karafili, me të cilin 20-vjeçarja dyshohej se kishte pasur lidhje. Karafili, i cili kishte precedentë penalë, mohoi përfshirjen dhe deklaroi se në momentin e vrasjes ndodhej në banesën e tij. Alibia e tij ishte konfirmuar nga bashkëshortja dhe prindërit.
Pavarësisht hetimeve të zhvilluara ndër vite nga policia dhe prokuroria, deri më tani askush nuk është akuzuar dhe dërguar përpara gjykatës për vrasjen e Kozeta Hysenit.
Rihapja e dosjes synon të rishikojë provat dhe dëshmitë e mbledhura ndër vite, si dhe të verifikojë rrethanat e ngjarjes për identifikimin dhe nxjerrjen përpara përgjegjësisë të autorit ose autorëve.a.b
