Këshilli Bashkiak i Divjakës është shprehur njëzëri kundër shkrirjes së bashkisë dhe bashkimit të saj me Lushnjën, në kuadër të propozimeve për reformën e re territoriale.
Në një mbledhje të jashtëzakonshme, këshilltarët kundërshtuan projektin e mazhorancës socialiste dhe kërkuan që Divjaka të vijojë të funksionojë si bashki më vete.
Këshilli vendosi gjithashtu ngritjen e një grupi pune prej shtatë anëtarësh, i cili do të organizojë dëgjesa me banorët e pesë njësive administrative: Divjakë, Tërbuf, Grabjan, Gradishtë dhe Remas. Përfundimet e këtyre konsultimeve do t’i përcillen Kuvendit.
Kryetari i Bashkisë Divjakë, Josif Gorrea, u shpreh gjithashtu kundër shkrirjes, duke deklaruar se nuk ishte informuar paraprakisht për këtë propozim. Sipas tij, përfaqësues të Partisë Socialiste i kishin komunikuar më herët se në Qarkun e Fierit nuk do të kishte ndryshime territoriale.
Gorrea vuri në dyshim edhe shifrat e paraqitura nga bashkëkryetari socialist i komisionit për reformën territoriale, Arbjan Mazniku, ndërsa kërkoi të sqarohet se çfarë përfitimesh do të kenë qytetarët nga bashkimi i bashkive.
Këshilltarët e Divjakës argumentuan se bashkimi me Lushnjën do të dëmtonte përfaqësimin dhe interesat e komunitetit, duke kërkuar që çdo ndryshim të bëhet vetëm pas konsultimit me banorët.
Vendimi i Këshillit Bashkiak të Divjakës vjen pas qëndrimeve të ngjashme të disa bashkive të tjera, ku këshilltarë të mazhorancës dhe opozitës janë shprehur kundër ndryshimeve të propozuara në hartën territoriale.a.b
