Një aksident tragjik është shënuar në fshatin Delisufaj, ku dy motra kanë humbur jetën pasi automjeti me të cilin udhëtonin ka dalë nga rruga dhe ka përfunduar në një kanal vaditës të mbushur me ujë.
Viktimat janë identifikuar si Mirela Hasko, 48 vjeçe dhe Florije Xhepa, 50 vjeçe.
Ngjarja ka ndodhur në dalje të fshatit. Sipas të dhënave paraprake, automjeti dyshohet se nuk ka mundur të futet në urë dhe ka përfunduar në kanal, duke mbetur i zhytur nën urë.
Rrjedha e ujit ka bërë që automjeti të zhvendosej më tej, ndërsa dy gratë kanë humbur jetën si pasojë e mbytjes.
Në vendngjarje kanë mbërritur shërbimet e emergjencës, të cilat kanë nxjerrë trupat e dy viktimave dhe i kanë transportuar drejt morgut të Lushnjës.
Grupi hetimor ka nisur punën për të përcaktuar shkaqet dhe rrethanat e plota të aksidentit tragjik.
