LDK tërhiqet nga kërkesat për poste politike, Abdixhiku: Do të qëndrojmë në opozitë.
Kryetari i Lidhjes Demokratike të Kosovës, Lumir Abdixhiku, ka njoftuar se partia e tij ka vendosur të heqë dorë nga çdo kërkesë për poste politike, me synimin për t’i hapur rrugë zgjidhjes së krizës institucionale në Kosovë.
Pas mbledhjes së grupit parlamentar të LDK-së, Abdixhiku deklaroi se partia nuk do të kërkojë pjesëmarrje në qeveri, poste ministrore apo drejtimin e Kuvendit. LDK-ja ka vendosur gjithashtu të tërhiqet nga kërkesa për postin e presidentit.
“Për ta çliruar procesin nga çdo alibi dhe për t’i hapur rrugë zgjidhjes në interes shtetëror, LDK-ja tërhiqet nga çdo kërkesë për pozita dhe merr përsipër të kontribuojë pa asnjë përfitim politik në shmangien e krizës aktuale”, tha Abdixhiku.
Ai theksoi se LDK-ja do të qëndrojë në opozitë dhe do ta ushtrojë këtë rol “me dinjitet”, duke shtuar se partia nuk do ta kthejë zhgënjimin politik në bllokadë institucionale.
“Meqë LVV-ja po vlerëson se s’ka nevojë për partnerë, s’do ta ketë as. Do të qëndrojmë në opozitë dhe do të ushtrojmë këtë përgjegjësi me dinjitet”, u shpreh ai.
Abdixhiku deklaroi se, pavarësisht vendimit për të mos kërkuar poste, LDK-ja është e gatshme të kontribuojë në zgjidhjen e krizës dhe të diskutojë për zgjedhjen e presidentit.
“Jemi të gatshëm të bisedojmë për zgjedhjen e një presidenti që mbron interesat e Republikës”, tha kryetari i LDK-së.m.k
