Në ditën e 75-të të protestave kundër qeverisë, qytetarët kanë vijuar qëndrimin para Kryeministrisë, duke kërkuar dorëheqjen e kryeministrit Edi Rama dhe të kabinetit qeveritar.
Një prej aktivistëve deklaroi se protesta do të vijojë deri në largimin e qeverisë, duke e cilësuar qëndrueshmërinë 75-ditore si shprehje të vullnetit të qytetarëve për ndryshim.
“Edhe sot jemi këtu, plot 75 ditë, për t’i treguar këtij pushteti se ne nuk largohemi pa u larguar këta”, u shpreh ai.
Aktivisti akuzoi qeverinë se nuk ka përmbushur, sipas tij, detyrimet ndaj qytetarëve dhe përsëriti thirrjen për dorëheqjen e kryeministrit dhe kabinetit të tij.
Në protestë ka folur edhe aktori Mehdi Malkaj, i cili bëri thirrje për bashkim dhe kundërshtoi ndarjet politike e krahinore.
“Ne nuk kemi Veri-Jug. Kjo është politikë e shpifur për të na përçarë”, deklaroi Malkaj, duke apeluar për bashkimin e shqiptarëve nga Konispoli deri në Tropojë.
Aktori tha se Shqipëria duhet parë si një e tërë, ndërsa kritikoi edhe ata që, sipas tij, i ndjekin protestat nga shtëpia pa marrë pjesë në to.
Malkaj përshëndeti gjithashtu anëtarët e Aleancës për Teatrin, të cilët, sipas tij, kanë qenë pjesë e protestës që prej ditës së parë.
Në fund të fjalës së tij, aktori kritikoi ashpër kryeministrin Edi Rama, të cilin e cilësoi si përgjegjësin kryesor për situatën politike në vend dhe bëri thirrje që qytetarët t’i kundërvihen qeverisë.
