Ndërtimet pa leje rikthehen në qendër të vëmendjes në Himarë, pas konstatimit të një objekti 5-katësh që po ndërtohej pa leje në vendin e quajtur “Sugë”.
Policia e Himarës ka arrestuar në flagrancë pronarin e objektit, shtetasin L. B., 39 vjeç, banues në Tiranë. Sipas policisë, objekti, një prej kateve të të cilit është nën tokë, ishte ende në proces ndërtimi dhe nuk dispononte leje ndërtimi.
Në kuadër të hetimeve, policia ka shpallur në kërkim edhe tre punonjës të Inspektoratit të Mbrojtjes së Territorit të Bashkisë Himarë, të dyshuar për “shpërdorim detyre”. Bëhet fjalë për kryeinspektorin D. H., 46 vjeç, dhe inspektorët M. K., 31 vjeç, dhe A. H., 42 vjeç.
Ngjarja rikthen pikëpyetjet mbi funksionimin e strukturave që kanë përgjegjësi për kontrollin e territorit në Bashkinë Himarë.
Ky është rasti i dytë gjatë drejtimit të kryebashkiakut Vangjel Tavo ku struktura e IMT-së përballet me masa pas konstatimit të ndërtimeve pa leje.
Më 9 qershor 2025, Tavo pezulloi drejtuesin dhe punonjësit e IMT-së së Himarës, pas evidentimit të ndërtimeve pa leje në Dhërmi, Drimadhë dhe Jalë. Në atë periudhë, IKMT ndërhyri në terren dhe shembi disa objekte në zonat e rivierës.
Përsëritja e rasteve ngre pikëpyetje mbi mënyrën e kontrollit të territorit në një prej zonave me presionin më të lartë ndërtimor dhe turistik në vend.
Ndërkohë, policia vijon punën për kapjen e tre punonjësve të shpallur në kërkim, si dhe për individualizimin dhe dokumentimin e përgjegjësive penale.
Materialet procedurale i janë referuar Prokurorisë për veprime të mëtejshme.
