Drafti i propozuar nga Partia Socialiste për reformën e re administrativo-territoriale është kundërshtuar edhe në Fushë Arrëz, ku banorë, përfaqësues të shoqërisë civile dhe drejtues vendorë kanë protestuar kundër bashkimit të kësaj bashkie me atë të Pukës.
Protestës iu bashkuan edhe bashkëkryetari opozitar i Reformës Administrativo-Territoriale, Luçiano Boçi, dhe deputeti Gjin Gjoni.
Kryebashkiaku i Fushë Arrëzit, Hilë Curri, e cilësoi të papranueshëm draftin dhe deklaroi se komuniteti nuk e pranon propozimin për bashkimin me Pukën. Ai shpalli gjithashtu të padëshiruar në qytet një prej hartuesve të draftit, Arbian Maznikun.
Kundër bashkimit u shprehën edhe drejtues të tjerë vendorë. Në mbështetje të banorëve të Fushë Arrëzit ishin kryebashkiaku i Mirditës, Albert Melyshi, dhe kryebashkiaku i Pukës, Rrok Dodaj.
Në protestë mori pjesë edhe ish-kandidati i Partisë Socialiste për deputet në këtë zonë dhe ish-kreu i Përgjithshëm i Rezervave të Shtetit, Pavlin Luli. Gjatë fjalës së tij, Luli shprehu mbështetjen për kundërshtimin e banorëve dhe kritikoi qeverinë dhe kryeministrin Edi Rama.
Përfaqësuesit e shoqërisë civile dhe banorët kërkuan që çdo vendimmarrje për reformën të paraprihet nga konsultimi me komunitetin dhe marrja në konsideratë e vullnetit të tyre.
Në përfundim të protestës, banorët njoftuan nisjen e mbledhjes së firmave për një peticion kundër draftit, ndërsa paralajmëruan përshkallëzim të protestave nëse kërkesat e tyre nuk merren në konsideratë.a.b
