Deputeti i Partisë Demokratike, Klevis Balliu, ka ngritur akuza lidhur me projektin “Smart City Albania”, duke pretenduar se kostoja e tij është rritur ndjeshëm dhe duke kërkuar transparencë për mënyrën e administrimit të fondeve dhe sigurinë e të dhënave të qytetarëve.
Sipas Balliut, projekti u prezantua në prill të vitit 2024 me një kosto prej rreth 60 milionë dollarësh, ndërsa brenda më pak se një viti vlera u rrit në 118.5 milionë dollarë. Ai pretendon se rritja është bërë pa një shpjegim bindës teknik apo financiar dhe pa një procedurë të hapur konkurruese.
Deputeti demokrat ka ngritur gjithashtu shqetësime për komponentin teknologjik të projektit, i cili parashikon instalimin e më shumë se 5 mijë kamerave inteligjente dhe sistemeve të mbikëqyrjes në qytetet kryesore, përfshirë edhe shkollat.
Balliu ka vënë në pikëpyetje edhe përfshirjen e kompanisë Presight AI, pjesë e grupit G42, duke iu referuar shqetësimeve të ngritura më herët në Shtetet e Bashkuara lidhur me marrëdhëniet e këtij grupi me entitete të lidhura me aparatin ushtarak dhe të inteligjencës të Kinës.
Sipas tij, Shqipëria, si vend anëtar i NATO-s, duhet të garantojë mbrojtjen e infrastrukturës kritike dhe të të dhënave personale të qytetarëve. Balliu kërkon që qeveria të bëjë publike vlerësimet e sigurisë dhe garancitë për mbrojtjen e të dhënave që do të përpunohen nga sistemi.
“Përse një projekt prej 60 milionë dollarësh u shndërrua në një barrë prej 118.5 milionë dollarësh, përse u anashkalua konkurrenca dhe çfarë garancish ka shteti shqiptar që të dhënat e qytetarëve dhe siguria kombëtare nuk do të vihen në rrezik?”, është një nga pyetjet e ngritura nga deputeti demokrat.
Në përfundim, Balliu deklaroi se transparenca mbi fondet publike, sigurinë kombëtare dhe privatësinë e qytetarëve duhet të jetë e plotë. Sipas tij, këto çështje janë ndër kërkesat e protestuesve që prej 69 ditësh zhvillojnë protesta para Kryeministrisë.a.b
