Banorë të Vaut të Dejës kanë protestuar pranë qendrës shëndetësore të zonës pas ngjarjes tragjike ku humbën jetën dy të rinj, David Deda dhe Sokol Preka, pasi ranë në kontakt me energjinë elektrike në fshatin Karmë.
Protestuesit kanë ngritur shqetësimin për vonesën e ambulancës, duke pretenduar se autoambulanca ka mbërritur rreth 1 orë e 30 minuta pas njoftimit. Sipas banorëve, kjo vonesë mund të ketë ndikuar në pasojat tragjike të ngjarjes.
Në protestë ishte edhe motra e Sokol Prekës, e cila, mes lotësh, kritikoi mungesën e reagimit në kohë nga shërbimet shëndetësore.
“Sot vdiqën dy vëllezër, Sokoli dhe Davidi. Dolën për të pirë kafe dhe dolën të vdekur. Spitali i Vaut të Dejës nuk ekziston, nuk ka ndihmë e asgjë. Të shkojë familjari të gjejë duke vdekur të afërmin e tij. Duam drejtësi për djemtë që vdiqën atje. Shkuan për një kafe dhe nuk na u kthyen më…”
Ngjarja e rëndë ndodhi në ambientet e një lokali në Karmë të Vaut të Dejës, ku David Deda, 46 vjeç, dhe Sokol Preka, 40 vjeç, humbën jetën pas kontaktit me energjinë elektrike.
Banorët kërkojnë zbardhjen e plotë të rrethanave të ngjarjes, ndërsa pretendimet për vonesën e ambulancës pritet të verifikohen nga institucionet përgjegjëse.a.b
