Shqipëria do të ketë së shpejti një ambasador të ri të Shteteve të Bashkuara. Senati amerikan ka konfirmuar Eric P. Wendt në krye të misionit diplomatik në Tiranë, duke i hapur rrugën emërimit të tij zyrtar pas nënshkrimit formal nga Presidenti i SHBA.
Kandidatura e Wendt u miratua në seancë plenare me 50 vota pro dhe 44 kundër, duke përmbyllur procesin e konfirmimit në Senat.
Eric P. Wendt sjell një përvojë të gjatë ushtarake dhe të sigurisë kombëtare. Ai shërben në Ushtrinë e SHBA-së që prej vitit 1986, ndërsa nga viti 1991 është pjesë e forcave elitare “Green Berets”. Pas sulmeve të 11 shtatorit, ai ka drejtuar operacione në Indonezi, Filipine, Irak dhe Afganistan.
Gjatë karrierës së tij ka mbajtur edhe poste të rëndësishme drejtuese, përfshirë detyrën e ndihmësit ushtarak kryesor të Sekretarit amerikan të Mbrojtjes, si dhe ka komanduar njësi të forcave speciale në nivele të ndryshme.
Në vitin 2017, Wendt u emërua Koordinator i Sigurisë i Shteteve të Bashkuara për Izraelin dhe Autoritetin Palestinez, një rol me përgjegjësi të lartë në një nga rajonet më të ndjeshme të botës.
Ai flet gjuhën arabe dhe koreane dhe është dekoruar me disa nga vlerësimet më të larta ushtarake amerikane dhe ndërkombëtare.
Emërimi i tij në Tiranë konsiderohet një sinjal i angazhimit të vazhdueshëm të Uashingtonit ndaj Shqipërisë dhe partneritetit strategjik mes dy vendeve, në një periudhë kur siguria rajonale dhe sfidat gjeopolitike mbeten prioritete të rëndësishme për aleancën transatlantike.
