Kryetari i Partisë Demokratike, Sali Berisha, ka akuzuar qeverinë se vijon të favorizojë biznesmenin Ermal Beqiri, pavarësisht se ai është shpallur në kërkim nga drejtësia shqiptare dhe është arrestuar së fundmi në Francë.
Në një deklaratë për mediat, Berisha tha se Beqiri, të cilin e cilësoi si “prestanome” të kryeministrit Edi Rama dhe biznesmenit Frang Gjoka, ka vazhduar të përfitojë pagesa nga buxheti i shtetit.
Ministria e Financave ka disbursuar së fundmi 8.5 milionë euro në favor të kompanisë së Beqirit, edhe pse ndaj tij ekziston një masë kërkimi për disa vepra penale.
“Në Shqipëri, krimi dhe shteti, shteti dhe krimi janë një dhe të pandarë. Në kërkim që nga dhjetori i vitit të kaluar, i arrestuar së fundmi në Francë, Ermal Beqiri vazhdon të paguhet me miliona euro. Së fundmi, Edi Rama urdhëroi ministren e Financave t’i disbursojë 8.5 milionë euro”, deklaroi Berisha.
Kreu i PD-së kritikoi edhe organet e drejtësisë pasi nuk kanë ndërmarrë veprime për bllokimin e kompanive të lidhura me Beqirin.
“Kompania e Ermal Beqirit vazhdon të paguhet me miliona euro, pavarësisht se prej 7 muajsh ai është në kërkim për disa vepra penale, përfshirë pjesëmarrjen në grup të strukturuar kriminal”, u shpreh ai.
Në deklaratën e tij, Berisha përmendi edhe emrin e Ervis Troplinit, duke theksuar se pasuritë e tij nuk janë sekuestruar dhe se aktiviteti i tyre vijon normalisht.
Në përfundim, kreu i demokratëve akuzoi qeverinë për lidhje me krimin e organizuar.
“Dënoj me forcën më të madhe këtë veprimtari, e cila dëshmon në mënyrën më flagrante se në këtë vend shteti dhe krimi janë një dhe vetëm një. Dhe se në krye të këtij aktiviteti të përbashkët qëndron Edi Rama me interesat e tij kriminale dhe organizatën e tij kriminale”, deklaroi Berisha.a.b
