Kryetari i Grupit Parlamentar të Partisë Demokratike, Gazment Bardhi, ka publikuar në Facebook propozimin e PD-së për reformën e re administrativo-territoriale, e cila parashikon organizimin e vendit në 100 bashki, 12 qarqe dhe 6 rajone.
Përmes postimit, Bardhi kritikon reformën territoriale të vitit 2014, duke e cilësuar atë si një nga arsyet e shpopullimit të vendit, ndërsa shprehet se edhe projekti i ri i propozuar nga Partia Socialiste synon, sipas tij, zbrazjen e mëtejshme të Shqipërisë.
“Reforma territoriale e vitit 2014 ishte leva e Arkimedit për shpopullimin e Shqipërisë! Reforma e re e propozuar nga PS ka si qëllim zbrazjen e mëtejshme të Shqipërisë. Kjo nuk është reformë, është hartë elektorale!”, shkruan Bardhi.
Sipas tij, ndryshimi i hartës administrativo-territoriale duhet të ndërtohet mbi dialogun dhe konsultimin me qytetarët, në përputhje me Kushtetutën dhe Kartën Europiane të Vetëqeverisjes Vendore.
“Shqipëria nuk mund të rishkruhet pa qytetarët! Ndryshimi i hartës territoriale kërkon dialog kombëtar, konsultim real dhe respektim të Kartës Europiane të Vetëqeverisjes Vendore e të Kushtetutës. Një reformë e imponuar nuk ndërton konsensus, por prodhon konflikt.”
Në përfundim të postimit, Bardhi thekson se Partia Demokratike, duke dëgjuar zërin e qytetarëve, ka paraqitur alternativën e saj për reformën territoriale, e cila parashikon 100 bashki, 12 qarqe dhe 6 rajone. a.b
