Kryetari i Partisë Demokratike, Sali Berisha, ka reaguar lidhur me arrestimin e biznesmenit Ermal Beqiri në Francë dhe pasuritë që dyshohet se i janë zbuluar nga autoritetet franceze. Berisha ishte në SPAK ndërsa në dalje bëri komentet e tij.
I pyetur nga gazetarët për këtë çështje, Berisha ngriti dyshime se hetimet duhet të sqarojnë pronësinë reale të pasurive të sekuestruara.
“Tani hetimi duhet të jetë, kështjella është e Ermal Beqirit apo e Edi Ramës dhe Olsi Ramës? Se ju e patë, ai kishte kështjellë, kishte jahte, kishte avion. Pra, pasuritë e shqiptarëve, rrogat, pensionet e tyre të vjedhura dhe të shtruara në pasuri përrallore nga Ermal Beqiri. Druaj shumë, megjithatë hetimet do ta tregojnë, se kështjella mund të jetë e Edi Ramës, mbasi ai nuk mund të toleronte në rrethin e tij kështjellarë të tjerë përveç vetes së tij. Mundet”, deklaroi Berisha.
Komentet e kreut të demokratëve vijnë pas arrestimit të Ermal Beqirit në Francë, ku autoritetet franceze po zhvillojnë procedurat për ekstradimin e tij drejt Shqipërisë, ndërsa hetimet vijojnë edhe mbi pasuritë që dyshohet se lidhen me biznesmenin. a.b
