Jola Hysaj ka reaguar pas emërimit të saj në detyrën e drejtoreshës së Agjencisë Kombëtare të Turizmit, duke konfirmuar se ka pranuar drejtimin e institucionit dhe duke iu përgjigjur pyetjeve e komenteve të shumta që, sipas saj, ka marrë në rrjetet sociale.
Përmes një postimi, Hysaj falënderoi për besimin e dhënë dhe u shpreh se synimi i saj është ta justifikojë këtë përgjegjësi me punë. Ajo konfirmoi gjithashtu se është takuar me kryeministrin Edi Rama, duke zbuluar mesazhin që, sipas saj, mori prej tij.
Ish-sekretarja për Marrëdhëniet me Publikun në Partinë Demokratike theksoi se bindjet e saj politike nuk kanë ndryshuar, por se nuk është më pjesë e Partisë Demokratike. Ajo shtoi se zgjedhja për të marrë drejtimin e Agjencisë Kombëtare të Turizmit lidhet me eksperiencën e saj shumëvjeçare në këtë sektor dhe u kërkoi ndjekësve të respektojnë vendimin e saj.
REAGIMI
Përshëndetje, meqë kam marrë shumë pyetje në whatsap nga miq ja përgjigja ime.
Po jam emëruar drejtore e Agjencisë Kombëtare të Turizmit. Jam shumë falenderuese për besimin dhe uroj ta justifikoj plotësisht.
Po e kam takuar Edi Ramën. Fjala që më mbeti në mend ishte: Nuk dua të bëhesh socialiste, dua të çosh më lart institucionin që ngriti Zana Çela.
Po jam demokrate, por nuk jam me Partinë Demokratike. Jam me partinë e Shqipërisë turistike.
Uroj të respektoni lirinë dhe zgjedhjen time për të bërë një punë të re në një sektor ku kam punuar shumë vite.
Gjithkush është i lirë të spekullojë dhe thurrë teori konspirative. Por kush më njeh e di që unë i pres drutë shkurt.
Kaq kisha nga ana ime. Kush do më urojë punë të mbarë e falenderoj! Kush do më shajë dhe mallkojë e ngushëlloj.
