Janë përshkallëzuar tensionet gjatë protestës qytetare të zhvilluar pranë Kuvendit të Shqipërisë, ku protestuesit u përplasën me forcat e Policisë së Shtetit në përpjekje për të çarë kordonin e sigurisë dhe për t’iu afruar godinës së Parlamentit.
Sipas raportimeve nga terreni, policia ka përdorur autobotin me ujë dhe gaz lotsjellës për të shpërndarë turmën, ndërsa protestuesit janë kundërpërgjigjur duke hedhur vezë, domate dhe shishe uji në drejtim të efektivëve. Gjatë tensioneve, një pjesë e gardhit metalik të vendosur për sigurimin e perimetrit është rrëzuar nga protestuesit.
Nga përplasjet raportohet se kanë mbetur të lënduar dy protestues, të cilët janë transportuar me ambulancë drejt spitalit për ndihmë mjekësore. Po ashtu, janë lënduar edhe dy efektivë të Policisë së Shtetit, njëri prej të cilëve ka pësuar dëmtime të lehta, ndërsa tjetri është gjakosur dhe është dërguar për trajtim mjekësor.
Policia kishte vendosur dy perimetra sigurie nga zona e pedonales deri në Rrugën e Elbasanit, duke mos lejuar protestuesit të afroheshin pranë Kuvendit, ku po zhvillohet seanca e fundit parlamentare e këtij sesioni.
Protesta qytetare ka hyrë sot në ditën e 54-të, ndërsa pjesëmarrësit kanë vijuar thirrjet kundër qeverisë dhe kanë kërkuar dorëheqjen e kryeministrit Edi Rama. Situata në zonën përreth Parlamentit mbetet e tensionuar, ndërsa forcat e rendit vijojnë të mbajnë nën kontroll perimetrin e sigurisë. a.b
