Prokuroria e Posaçme (SPAK) dhe Byroja Kombëtare e Hetimit (BKH) kanë zhvilluar kontrolle në ambientet e Këshillit Kombëtar të Territorit (KKT), ku janë sekuestruar dhjetëra dosje që lidhen me leje ndërtimi dhe investime në disa nga zonat të vendit, konfirmuan sot për droni.al burime të besueshme.
Sipas burimeve, materialet e sekuestruara përfshijnë praktika për projekte në qarkun e Vlorës, Sarandë, Tiranë dhe Gjirin e Lalzit. Veprimet janë kryer me autorizim të gjykatës, në kuadër të një hetimi që lidhet me dyshime për pastrim parash përmes investimeve në sektorin e ndërtimit.
Raportohet se një pjesë e kompanive të përfshira dyshohet se janë përdorur për investimin e të ardhurave me burim kriminal.
Sipas materialeve hetimore, po verifikohen dyshime për ndikim të paligjshëm ndaj administratës publike dhe zyrtarëve shtetërorë, me qëllim ndryshimin e statusit të zonave të gjelbra për të mundësuar zhvillimin e projekteve të ndërtimit. Mes tyre disa kanë lidhje me dosjen Aruba.
Po ashtu, hetuesit po analizojnë komunikime të administruara nga letërporositë ndërkombëtare, ku përmenden pagesa të dyshuara për ndryshimin e destinacionit të tokave, si dhe referenca për përfshirjen e studiove të huaja të arkitekturës në hartimin e projekteve.
SPAK dhe BKH nuk kanë dhënë ende një reagim zyrtar mbi rezultatet e kontrolleve, ndërsa hetimet vijojnë.a.b
