Është ndarë nga jeta në moshën 89-vjeçare akademik Emin Riza, një prej figurave më të shquara të arkitekturës dhe trashëgimisë kulturore shqiptare. Lajmi është bërë i ditur nga Akademia e Shkencave e Shqipërisë, e cila i shprehu ngushëllimet familjes, miqve dhe komunitetit akademik për humbjen e një studiuesi me kontribut të jashtëzakonshëm.
I lindur më 3 korrik 1937 në Shkodër, Riza ia kushtoi jetën studimit, dokumentimit dhe mbrojtjes së monumenteve të kulturës dhe arkitekturës tradicionale shqiptare. Gjatë karrierës së tij si studiues, pedagog dhe specialist në Institutin e Monumenteve të Kulturës, ai dha një ndihmesë të vyer në ruajtjen e trashëgimisë materiale të vendit.
Ndër veprat e tij më të njohura janë monografitë “Qyteti-Muze i Gjirokastrës” dhe “Banesa shqiptare me qoshk”, ndërsa ishte autor i 16 monografive dhe 134 artikujve shkencorë. Riza drejtoi gjithashtu revistat shkencore “Studia Albanica” dhe “Monumentet”.
Akademik Emin Riza ishte nismëtar i Ligjit “Për Trashëgiminë Kulturore” dhe udhëhoqi grupin e punës për përgatitjen e dosjeve të Gjirokastrës dhe Beratit për UNESCO, duke kontribuar në përfshirjen e tyre në Listën e Trashëgimisë Botërore.
Për kontributin e tij u nderua me titullin “Qytetar Nderi” i Gjirokastrës dhe Beratit, duke lënë pas një trashëgimi të çmuar për kulturën dhe shkencën shqiptare.
Homazhet për akademik Emin Rizën do të zhvillohen sot në ambientet e agjencisë funerale Alba 2000, pranë Medresesë, ndërsa ceremonia e përcjelljes për në banesën e fundit do të mbahet në orën 16:00, në varrezat e Tufinës.
