Lëvizja qytetare kundër qeverisë vijoi mbrëmjen e së martës me protestën e saj të 53-të radhazi. Pas grumbullimit në Sheshin “Skënderbej”, protestuesit marshuan drejt Kryeministrisë dhe më pas në rrugët e Tiranës, duke kërkuar dorëheqjen e kryeministrit Edi Rama.
Gjatë tubimit u dëgjuan thirrje si “Rama, jep dorëheqjen”, “Nuk na përfaqëson” dhe “Shqipëria nuk është në shitje”, ndërsa pjesëmarrësit kërkuan ndryshime politike dhe hetimin e aferave që, sipas tyre, kanë dëmtuar interesin publik.
Një prej protestuesve u bëri thirrje qytetarëve të bashkohen në protestën e paralajmëruar përpara Parlamentit, duke e cilësuar situatën në vend si kritike. Ai përmendi edhe arrestimet e fundit në Postën Shqiptare, duke thënë se ato tregojnë nevojën për ndryshim.
Në fjalën e tij, eksperti i IT-së Gent Progni ironizoi kryeministrin Rama dhe deklaroi se protesta e së nesërmes do të jetë paqësore. Ai u bëri thirrje pjesëmarrësve të përdorin vetëm vezë si formë simbolike proteste dhe kërkoi nga policia të shmangë provokimet.
